FbTelugu

తెలంగాణలో లాక్‌డౌన్ ఉంటుందా?

తెలంగాణ రాష్ట్రంలో క‌రోనా వైర‌స్ వ్యాప్తి వేగంగా కొనసాగుతోంది. ఇప్పటికే 2వేలు దాటిన రోజువారీ కేసులు 3వేలకు చేరువవుతున్నాయి. తాజాగా గురువారం రాష్ట్ర వ్యాప్తంగా 2,707 కేసులు నమోదైనట్లు వైద్య ఆరోగ్య శాఖ అధికారులు తెలిపారు. రాష్ట్రంలో ఇప్పటికే థర్డ్ వేవ్ మొదలైందని, సంక్రాంతి తర్వాత ఊహించని రీతిలో కేసులు నమోదవుతాయని వైద్య శాఖ ఇప్పటికే ప్రకటించింది. ఈ నేపథ్యంలోనే తెలంగాణలో నైట్ కర్ఫ్యూ, లాక్‌డౌన్ అంటూ రకరకాల ప్రచారాలు కొనసాగుతున్నాయి.

దీనిపై ఓ నెటిజన్ అడిగిన ప్రశ్నకు మంత్రి కేటీఆర్ క్లారిటీ ఇచ్చారు. ‘ఆస్క్ కేటీఆర్’ పేరుతో ట్విటర్‌లో నెటిజన్ల ప్రశ్నలకు ఆయన సమాధానమిచ్చారు. ఈ సందర్భంగా తెలంగాణలో లాక్‌డౌన్‌పై ఓ నెటిజన్ ప్రశ్నించగా… కరోనా కేసులు, వైద్యారోగ్య శాఖ సలహాల మేరకే రాష్ట్రంలో లాక్డౌన్, రాత్రి కర్ఫ్యూ వంటి నిర్ణయాలు ఉంటాయని వెల్లడించారు. ప్రస్తుతానికైతే కర్ఫ్యూ, లాక్‌డౌన్‌ లాంటి ఆలోచనలు ప్రభుత్వానికి లేవని స్పష్టం చేశారు. కరోనా కేసుల సంఖ్య పెరిగితే మాత్రం ప్రజారక్షణ మేరకు సరైన నిర్ణయాలు తీసుకుంటామన్నారు.

కరోనా కేసులు పెరుగుతుండటంతో ప్రభుత్వం 8వ తేదీ నుంచి 16వ తేదీ వరకు స్కూళ్లు, కాలేజీలకు సెలవులు ప్రకటించింది. గత వారం కంటే రెట్టింపు స్థాయిలో ఇప్పుడు కేసులు నమోదవుతున్న నేపథ్యంలో వచ్చే వారం నుంచి విద్యాలయాలు తెరుచుకుంటాయా? లేదా? అన్నది సస్పెన్స్‌గా మారింది. దీనిపై ప్రభుత్వం ఎలాంటి ప్రకటన చేస్తుందా? అని అందరూ ఎదురుచూస్తున్నారు.

You might also like

Leave A Reply

Your email address will not be published.