FbTelugu

వ్యాపారం దగ్గర మొదలైన గొడవ. గొడవకు వెళ్లి చనిపోయిన యువకుడు.

సుపారీ తీసుకుని ఒకరిని కొట్టేందుకు ఐదుగురు యువకులు సిద్ధమయ్యారు. సిగరెట్ కొంటున్నట్లు నటించి రేటు విషయమై గొడవపెట్టుకున్నారు. దుకాణదారుడిని కొట్టారు కూడా. ఆ తర్వాతే కథ అడ్డం తిరిగింది. ఐదుగురు ఉన్నప్పటికీ దుకాణదారు, అతని భార్య ఎదురుతిరగడంతో సీన్ రివర్సైంది. కొడదామని వచ్చిన యువకుడే దంపతుల దాడిలో చనిపోయాడు. తలపై గట్టిగా కొట్టడంతో అక్కడికక్కడే కుప్పకూలిపోయాడు. డబ్బులకు కక్కుర్తి పడి ఎవరినో కొట్టేందుకు వచ్చి యువకుడు ప్రాణాలు పోగొట్టుకున్న షాకింగ్ ఘటన వరంగల్ జిల్లాలో జరిగింది.

మహదేవపూర్ మండలం కాళేశ్వరానికి చెందిన శ్రీనివాస్, చల్లా రమ గ్రామంలో ఎదురెదురుగా దుకాణాలు పెట్టుకున్నారు. కస్టమర్ల విషయమై ఇద్దరి మధ్య గొడవలు జరుగుతున్నాయి. గత నెలలో మరోమారు ఇద్దరికీ గొడవ జరగడంతో రమ ఎలాగైనా శ్రీనివాస్‌పై పగ తీర్చుకోవాలనుకుంది. అతన్ని కొట్టించి భయపెట్టాలని భావించి వరంగల్‌కి చెందిన వంశీని ఆశ్రయించింది. తన షాపు ఎదుట ఉన్న శ్రీనివాస్‌ని కొట్టేందుకు డీల్ కుదుర్చుకుని సుపారీ రూ.25 వేలు ఇచ్చింది.

రంగంలోకి దిగిన వంశీ ఖిలావరంగల్ మండలం రంగశాయిపేటకు చెందిన తన స్నేహితులు అస్లాం, అల్తాఫ్, వాసిముద్దీన్, వెంకట్, సాయితేజను కాళేశ్వరం రప్పించారు. అందరూ కలసి ఫుల్లుగా మద్యం తాగిన తర్వాత శ్రీనివాస్ షాపు వద్దకు వెళ్లారు. సిగరెట్ కొంటున్నట్లు నటిస్తూ ధర విషయమై శ్రీనివాస్‌తో గొడవపడ్డారు. పక్కనే ఇనుప వస్తువుతో శ్రీనివాస్‌పై దాడి చేశారు. దీంతో శ్రీనివాస్, అతని భార్య ఎదురుతిరగడంతో కథ అడ్డం తిరిగింది.

నలుగురు యువకులపై దంపతులు ఎదురుదాడికి దిగారు. గ్యాస్‌ స్టవ్ తీసుకుని సాయితేజ తలపై బలంగా కొట్టడంతో అక్కడికక్కడే కుప్పకూలిపోయాడు. స్థానికులు గమనించి వెంటనే ఆస్పత్రికి తరలించారు. అక్కడి నుంచి వరంగల్ ఎంజీఎంకి తరలించగా చికిత్స పొందుతూ ప్రాణాలు కోల్పోయాడు. సమాచారం అందుకున్న పోలీసులు దంపతులను అదుపులోకి తీసుకుని విచారించడంతో ఎదురు షాపు నిర్వహిస్తున్న చల్లా రమతో గొడవలున్నట్లు తేలింది. ఆమెను కూడా అదుపులోకి తీసుకుని తమ స్టైల్లో విచారించడంతో అసలు విషయం కక్కేసింది. దంపతులతో పాటు సుపారీ గ్యాంగ్ ఐదుగురిని పోలీసులు అరెస్టు చేశారు.

You might also like

Leave A Reply

Your email address will not be published.