FbTelugu

వైసీపీ నేత సెల్ఫీ వీడియో. పార్టీ కోసం రూ.30లక్షలు నష్టపోయాను.

గుంటూరు జిల్లాలో సొంత పార్టీపై వైఎస్సార్‌సీపీ కార్యకర్త మండిపడ్డారు. అమరావతి మండలం మల్లాదికి చెందిన దళిత నేత చిన్నా.. పార్టీ నేతలపై అసంతృప్తి వ్యక్తం చేశారు. వైఎస్సార్‌సీపీ కోసం తాను రూ. 30 లక్షలు నష్టపోయానని.. తనలా ఎవరూ మోసపోవద్దని కోరారు. పదేళ్లుగా పార్టీనే నమ్ముకున్న తనలాంటివారిని ఎవరూ పట్టించుకోవడం లేదన్నారు. ‘మనకూ టైమ్ వస్తుంది.. అప్పుడు మనమేంటో చూపుదామంటూ’ అసంతృప్తులకు సూచించారు.

అమరావతి ప్రాంతంలో మూడు రాజధానులకు అనుకూలంగా కార్యక్రమాలను నిర్వహించానని చెప్పుకొచ్చారు. ఓటేసిన ప్రతి కార్యకర్త ఇప్పుడు బాధపడుతున్నారని.. ఆ బాధను వీడియో ద్వారా చెప్పుకొచ్చారు. శ్రీకాకుళం నుంచి చిత్తూరు వరకు చాలామంది తమలాంటి వారు ఉన్నారన్నారు. కార్యకర్తలు లేకపోతే పార్టీనే లేదని.. నేతలు సొంత బంధువులకే ప్రాధాన్యం ఇస్తున్నారని ఆవేదన వ్యక్తం చేశారు. కష్టపడి గెలిపిస్తే ఎమ్మెల్యేలు పట్టించుకోవడం లేదని తీవ్ర ఆవేదన వ్యక్తం చేశారు. చిన్నా సెల్ఫీ వీడియో ఇప్పుడు సోషల్ మీడియాలో వైరల్ అవుతోంది.

మరోవైపు ఏపీ ముఖ్యమంత్రి వైఎస్ జగన్మోహన్ రెడ్డి గుంటూరు పర్యటనలో తీవ్ర ఉద్రిక్త పరిస్థితులు నెలకొన్నాయి. గుంటూరు నగరంలో ఐటీసీ వెల్‌కమ్ హోటల్ ప్రారంభోత్సవం కోసం బుధవారం సీఎం జగన్ వెళ్లారు. అదే సమయంలో కొందరు అధికార వైఎస్సార్ కాంగ్రెస్ పార్టీ కార్యకర్తలు సీఎం జగన్‌ను కలిసేందుకు ప్రయత్నించారు. అయితే, పోలీసులు వారిని అడ్డుకోవడంతో.. తోపులాట చోటు చేసుకుంది.

సీఎం జగన్ కాన్వాయ్ వెళ్తున్న సమయంలో ఒక్కసారిగా వైసీపీ శ్రేణులు దూసుకొచ్చారు. వైఎస్సార్ సీపీ ఆవిర్భావం నుంచి పని చేస్తున్న తమను పక్కనబెట్టి.. కొత్తగా పార్టీలో చేరిన వారికి ప్రాధాన్యం ఇస్తున్నారని వైసీపీ యువజన విభాగం స్టేట్ జనరల్ సెక్రటరీ కొరటి ప్రేమ్ కుమార్ ఆవేదన వ్యక్తం చేశారు. ముఖ్యమంత్రి జగన్‌ను కలిసేందుకు పర్మీషన్ లేదని అడ్డుకోవడం ఎంత వరకు సబబని ప్రశ్నించారు.

జగన్మోహన్ రెడ్డిని ముఖ్యమంత్రి చేసేందుకు, వైసీపీ అధికారంలోకి రావడం కోసం తాము ఎన్నో ధర్నాలు చేశాం, దెబ్బలు తిన్నామని ప్రేమకుమార్ ఆవేదన వ్యక్తం చేశారు. అయినా సరే, జగన్ ముఖ్యమంత్రి అయ్యాక ఒక్కసారి కూడా ఆయన్ను కలిసే అవకాశం రాలేదని ఆవేదన వ్యక్తం చేశారు. జగన్మోహన్ రెడ్డి అధికారంలోకి రావడానికి కష్టపడ్డ తమను ఇప్పుడు దూరం పెట్టడం బాధిస్తోందన్నారు. ఇప్పుడు మరో కార్యకర్త తన ఆవేదనను వ్యక్తం చేశారు.

You might also like

Leave A Reply

Your email address will not be published.